ՄԱԿ Գլխավոր վեհաժողովն ընդունել է Կուբայի դեմ ԱՄՆ ձեռնարկած տնտեսական, առեւտրային ու ֆինանսական շրջափակումը դադարացնելու անհրաժեշտության մասին բանաձեւը։ Երկար տարիների ընթացքում առաջին անգամ ԱՄՆ պատվիրակությունը որոշել է ձեռնպահ մնալ այդ բանաձեւի քվեարկությունից։

Կուբայի դեմ էմբարգոն ԱՄՆ-ն սահմանել էր դեռ 1962-ին։ Կուբայի նկատմամբ տնտեսական էմբարգոն չեղարկելու հարցը արդեն երկար տարիներ ՄԱԿ ԳՎ-ի օրակարգում է։ ԳՎ-ն 25 տարի անընդմեջ ընդունում է բանաձեւեր, որոնք կոչ են անում չեղարկել շրջափակումը։ 1992-ին այն աջակցել են 59 պետություններ, 2008-ին՝ 185։

Իսկ այս տարի բանաձեւի օգտին քվեարկել է 191 երկիր։ ԱՄՆ ու Իսրայելի պատվիրակությունները ձեռնպահ են մնացել։ ՄԻնչդեռ նախորդ տարիներին ԱՄՆ-ն մշտապես դեմ էր քվեարկում այդ բանաձեւերին։

Ընդունված բանաձեւում ՄԱԿ անդամ պետությունները ողջունել են Կուբայի ու ԱՄՆ-ի կառավարությունների միջեւ հարաբերություններում նկատվող առաջընթացը ու այդ համատեքստում՝ նաեւ Բարաք Օբամայի այցը Կուբա 2016-ի մարտին։