Սիրիայի խնդրի կարգավորման հարցն անհնար է առանց Իրանի ու Ռուսաստանի։ Բանակցային գործընթացից այդ երկրներին բացառելը կնշանակեր նոր խնդիրներ ստեղծել։ Այս մասին Չիկագոյի միջազգային հարաբերությունների խորհրդում ելույթի ժամանակ ասել է ԱՄՆ պետքարտուղար Ջոն Քերրին, փոխանցում է «ՌԻԱ Նովոստի»–ն։
«Ահա թե ինչու մեկ տարի առաջ մենք կազմավորեցինք Սիրիայի աջակցության միջազգային խումբը, որում ընդգրկված էին հակամարտությանը ներգրավված երկրները, այդ թվում՝ Ռուսաստանն ու Իրանը։ Ինչ–որ մեկն ասում է, թե ինչու՞ եք դուք նստած բանակցային սեղանի շուրջ նրանց հետ։ Որովհետեւ նրանք ներգրավված են։ Դառնալ համաձայնագրի մաս առանց նրանց, նշանակում է նոր խնդիրներ ստեղծել»,– ասել է Քերրին։
Նա հավելել է, որ դեռեւս հավատում է, որ Սիրիայի հակամարտությունը հնարավոր է կարգավորել դիվանագիտական միջոցներով, թեպետեւ դա բարդ է։