Եվրամիությունը Հայաստանի կարեւորագույն գործընկերներից է՝ ինչպես երկկողմ առեւտրում, այնպես էլ ներդրումների առումով: Այս մասին հոկտեմբերի 27-ին Երեւանում մեկնարկած Եվրամիության «Արեւելյան ներդրումներ 2» ծրագրի գործընկերների ամենամյա համաժողովում հայտարարել է Հայաստանի Առեւտրա-արդյունաբերական պալատի նախագահ Մարտին Սարգսյանը:
Նրա խոսքով՝ 2015 թվականին, հանրապետության Մաքսային ծառայության տվյալների համաձայն, ԵՄ անդամ երկրների հետ Հայաստանի ապրանքաշրջանառությունը կազմել է շուրջ 1.2 մլրդ դոլար. հանրապետության ապրանքաշրջանառության ընդհանուր ծավալների շուրջ 25%-ը:
«Վստահ եմ, որ առաջիկա շաբաթվա ընթացքում նախաձեռնության շրջանակում կարեւորագույն միջոցառումները, ինչպես նաեւ Հայաստանի եւ Եվրամիության միջեւ համաձայնագրի կնքման շուրջ բանակցությունները զգալի նշանակություն կունենան Հայաստանի գործարար կապերի եւ տնտեսության զարգացման համար»,- ամփոփել է Մարտին Սարգսյանը: