Քաղաքագետ Սերգեյ Մինասյանը տեսանելի հեռանկարում «ղարաբաղյան փակուղուց» ելք չի տեսնում: Այսօր՝ հոկտեմբերի 27-ին կայացած մամուլի ասուլիսում Սերգեյ Մինասյանը նշեց, որ Մինսկի խմբի համանախագահների ներկայացրած՝ Համբուրգում դեկտեմբերին նախատեսված ԵԱՀԿ արտաքին գործերի նախարարների խորհրդի նիստի շրջանակում Հայաստանի եւ Ադրբեջանի ԱԳ նախարարների հանդիպումը պետք է ուղղված լինի նախագահների հանդիպումը նախապատրաստելուն:
«Կարծում եմ՝ ԵԱՀԿ-ում նախագահող Գերմանիայի ներկայացուցիչների հետ կփորձեն առաջընթացի հասնել Կասպշիկի խմբի ընդլայնման հարցում: Կահաջողվի՞: Ես հոռետեսորեն եմ տրամադրված»,- նշեց Սերգեյ Մինասյանը:
Նա նաեւ դժվարացավ ասել, թե որքանով է նպատակահարմար բարձր մակարդակով հանդիպումը՝ նկատի ունենալով, որ ադրբեջանական կողմը նույնիսկ ձեւական առաջընթացին է խոչընդոտում:
Ի պատասխան հարցին՝ փակուղուց ելք տեսնո՞ւմ է, Սերգեյ Մինասյանը կրկին հոռետեսական տեսակետ հայտնեց: Սա հակամարտության դասական օրինակ է, ասաց նա՝ հիշեցնելով, որ այդպիսի հակամարտությունները դժվար են լուծվում:
