ԵՄ–ն Վրաստանի համար 30 մլն եվրոյի չափով հատուկ դրամաշնորհ կհատկացնի կառավարման բարեփոխումերի նպատակով։ Այս մասին Վրաստանի կառավարության նիստում ասել է վարչապետ Գեորգի Քվիրիքաշվիլին, փոխանցում է «Գրուզիա Օնլայն»–ը։
Վրաստանի վարչապետի խոսքով՝ այդ մասին առավել մանրամասն կասվի ԵՄ ներկայացուցչության ղեկավար Յանոշ Հերմանի հետ վաղվա ճեպազրույցի ժամանակ։
«Իրականացվում է մի շատ կարեւոր համաձայանգիր։ Դա ԵՄ–ի կողմից Վրաստանի համար 30 մլն եվրոյի չափով հատուկ դրամաշնորհի ծրագիրն է, որը հատուկ դրամաշնորհ է կառավարման բարեփոխումների համար։ Հայտնի է, որ այդ բարեփոխումը մեր 4-կետանոց պլանի գլխավոր ուղղություններից մեկն է։ Մենք շատ ուրախ ենք, որ ԵՄ–ն այդ ուղղությամբ հատուկ օգնություն է հատկացնում։ Մենք բնականաբար պետք է շատ ջանքեր գործադրենք ստանձնած պարտավորությունները կատարելու համար»,– ասել է Քվիրիքաշվիլին։