Findo որոնման համակարգը ProductHunt հարթակի քվեարկությունների արդյունքում առաջ է անցել Google Jamboard-ից՝ առաջատարի դիրքը զիջելով միայն Slack հարթակին: Այս մասին ֆեյսբուքյան իր էջում գրել է ABBYY-ի հիմնադիր եւ տնօրենների խորհրդի նախագահ, «Այբ» հիմնադրամի համահիմնադիր Դավիթ Յանը:
Նա տեղեկացրել է, որ Արհեստական Ինտելեկտի, որոնման, բջջային տեխնոլոգիաների եւ ամպային լուծումների լավագույն 16 ինժեներների հետ երկուսուկես տարվա համատեղ աշխատանքի արդյունքում այժմ ներկայացված է Findo խելացի որոնման համակարգի 1.0 տարբերակը:
Findo-ի խելացի բոտը գDropbox, Evernote, Gmail, Google Drive, OneDrive, Outlook, YahooMail –ում կամ համակարգչում ցանկացած տվյալ գտնելու խելացի համակարգ է:
Պրոդուկտի ամենակարեւոր մասն անելիքների առաջնայինությունը գուշակելու ունակությունն է: Համակարգը «ճանաչում է» կարեւոր նամակները: Օրինակ, եթե ձեր ղեկավարը ձեզ նամակ է ուղարկել՝ խնդրելով նախորդ ամսվա հաշվետվությունը, եւ դուք ինչ-ինչ պատճառներով չեք կարդացել նամակը, ապա Findo-ն մեսինջերի միջոցով ձեզ կտեղեկացնի դրա մասին եւ հեշտությամբ կգտնի այդ հաշվետվությունը: Findo որոնման բոտը կօգնի թիմում աշխատող մարդկանց աշխատանքը դարձնել արագ եւ էֆեկտիվ:
Հիշեցնենք, որ 2016 թվականի հունվարին ABBYY ընկերությունը ներկայացրել էր Findo որոնման համակարգը: Findo-ի թողարկումից ժամեր անց ընկերությունը ստիպված է եղել 30 րոպեով կանգնեցնել ծառայության աշխատանքը՝ օգտատերերի անհավանական հոսքի պատճառով:
ProductHunt-ը ՏՏ նախագծերի ներկայացման կայք է, ուր քվեարկության ընթացքում ամենաշատ ձայներ ստացած պրոդուկտները հայտնվում են ամենօրյա թոփ ցուցակում: