Հայաստանը բանակցություններ է վարում արեւմտյան լոուքոստերների հետ։ Այս մասին հոկտեմբերի 27-ին՝ Կառավարության նիստից հետո, լրագրողներին ասել է Հայաստանի քաղավիացիայի գլխավոր վարչության պետ Սերգեյ Ավետիսյանը։
Նրա խոսքով՝ բանակցություններն ընթանում են Քութաիսիից թռիչքներ իրականացնող հունգարական Wizz Air–ի եւ այլ ավիաընկերությունների հետ։ Հարցն այն է, թե ավիաընկերություններն ինչ պահանջարկ կգտնեն Հայաստանում։ Ոչ մեկի համար գաղտնիք չէ, որ Ռուսաստանը դեպի Հայաստան եւ հակառակ ուղղություններով համար մեկ երթուղին է։ «Այդպես է եղել, եւ կարծում եմ, որ դեռ շատ երկար կմնա։ Այստեղի էլ առաջին հերթին ռուսական լոուքոստերի հետաքրքրությունը»,– ասել է Ավետիսյանը։
Ավելի վաղ պաշտոնյան վստահություն էր հայտնել, որ «Պոբեդա» լոուքոստերը «999 ռուբլուց սկսած» գին կառաջարկի նաեւ Հայաստանի համար։ Նա հաստատել էր, որ ռուսական ավիաընկերությունը Մոսկվա–Գյումրի չվերթներ կիրականացնի, ըստ երեւույթին, նոյեմբերի վերջից։