Ոչ ոք չի ասում, որ «Հյուսիս–Հարավ» ավտոմայրուղու շինարարությունը կդադարեցվի։ Այս մասին հոկտեմբերի 27-ին՝ Կառավարության նիստից հետո, լրագրողներին ասել է տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը։

«Ինչու՞ եք ասում, որ դադարել ենք կառուցել։ Ես նման բան չեմ հիշում։ աշխատանքի դադարեցման մասին խոսք չի եղել։ Խոսել ենք դետալները վերանայելու մասին, բայց ոչ ավելին»,– ասել է նախարարը։

Նա հիշեցրել է, որ, համաձայն գրաֆիկի, 3-րդ տրանշի (Թալին–Գյումրի) աշխատանքները կավարտվեն 2018-ին։ Այստեղ շինարարությունն ընթանում է Զարգացման ասիական բանկի եւ Եվրոպական ներդրումային բանկի վարկերով։ Իսկ շինարարության մրցույթը ամենահարավային հատվածում՝ Մեղրի–Քաջարան տեղամասում, շուտով կավարտվի։ Այստեղ աշխատանքներն ընթանում են ՎԶԵԲ–ի վարկերի միջոցով։ «Այնպես որ գրաֆիկից հետ չենք մնում»,– ասել է Մարտիրոսյանը։