Հայաստանի համար բավական հրատապ խնդիր է Իրանի, Վրաստանի եւ Ռուսաստանի հետ էներգետիկ համակարգերի տեղաբաշխման ցանցերի համադրելիության ապահովումը: Այս մասին հոկտեմբերի 27-ին հայտարարել է «Բարգավաճ Հայաստան» խմբակցության պատգամավոր Միքայել Մելքումյանը:
«Եթե չեմ սխալվում, արտասահմանյան վարկերի հաշվին լուրջ ներդրումներ են կատարվում, մասնավորապես՝ Աշնակում: Կխնդրեի հստակեցնել՝ էներգահամակարգերի համադրության դեպքում մենք ի՞նչ ծավալով էլեկտրաէներգիա կկարողանանք արտահանել: Ինչպե՞ս է այդ համաձայնագիրը նպաստում այդ էլեկտրաէներգետիկ համակարգերի արդյունավետ գործունեությանը»,- հարց է տվել Միքայել Մելքումյանը:
Ի պատասխան պատգամավորի հարցի՝ էներգետիկ ենթակառուցվածքների եւ բնական պաշարների փոխնախարար Արեգ Գալստյանը հայտարարել է. «Մենք փորձում ենք ստեղծել էլեկտրաէներգիայի Իրան-Հայաստան-Վրաստան-Ռուսաստան տարածաշրջանային շուկա: Դրան չենք կարող հասնել առանց էլեկտրահաղորդման լրացուցիչ կայանների կառուցման: Այդ պատճառով մի քանի տարի առաջ Գերմանիայի կառավարության նախաձեռնությամբ KWF բանկի միջոցով համապատասխան գումար տրամադրվեց, որին 10 մլն եվրոյով միացավ նաեւ Եվրոպական ներդրումային բանկը»:
Ըստ փոխնախարարի՝ Եվրամիությունն ինքը 10 մլն դրամաշնորհ է տրամադրել, որպեսզի Հայաստանը կարողանա այդ ծրագրի առաջին փուլն սկսել: «Երկրորդ փուլի համար մենք նախնական պայմանավորվածություն ունենք, բոլոր փաստաթղթերը պատրաստ են: Այդ երկու փուլերով նախատեսվում է առաջինը Այրումում կառուցել 400-500 կՎ ենթակայան, որը թույլ կտա Հայաստանի 400 կՎ ցանցի միջոցով Վրաստան էլեկտրաէներգիա փոխանցել կամ այնտեղից ստանալ: Նրանք Մառնեուլում արդեն ներդրումներ են կատարել, համապատասխան սարքավորում է տեղակայված»,- ասել է Արեգ Գալստյանը:
