Հայաստանում չի կարելի նվազեցնել բնական մենաշնորհների շահույթը: Այս մասին հոկտեմբերի 27-ին՝ խորհրդարանում հայտարարել է Հանրային ծառայությունները կարգավորող հանձնաժողովի նախագահ Ռոբերտ Նազարյանը՝ 2017 թվականին ՀԾԿՀ գործունեության ծրագրի քննարկմանը:

Բնական մենաշնորհների շահույթը (բացի էլեկտրաէներգիայի օպերատորներից) 10 տոկոս է կազմում, շահույթի հարկումից հետո՝ 8 տոկոս: Իսկ Հայաստանի պետական պարտատոմսերի եկամտաբերությունը 10-ից մինչեւ 13,5 տոկոս է: Բնականաբար, գործարարների մեծ մասի մոտ հարց է առաջանում՝ ինչո՞ւ աշխատել, եթե կարելի է փողը ներդնել պարտատոմսերի մեջ, որոնք, դրա հետ մեկտեղ, չեն հարկվում, նշել է Նազարյանը:

«Բարգավաճ Հայաստան» խմբակցության պատգամավոր Միքայել Մելքումյանը սրա հետ կապված նշել է, որ «Հայաստանի էլեկտրացանցերի» շահույթն ավելի մեծ է՝ 17 տոկոս, իսկ հարկերը հանելով 14 տոկոս: Դրանից բացի, իր աշխատանքի 2 տարվա ընթացքում «Էլեկտրացանցերի» նոր կառավարիչը էներգիայի կորուստները կրճատել է 12,9 տոկոսից մինչեւ 11 տոկոս (սակագնում հաշվարկված նորմայի սահմանում, այսինքն՝ ծախսերի ավելցուկն արդեն ստիպված չէ շահույթից փակել):  «Ես չեմ ասում «Էլեկտրացանցերը» մեծ կամ փոքր շահույթ ունի: Ցանկանում եմ միայն ասել, որ այստեղ պաշար կա»,- հայտարարել է Մելքումյանը:

Ի պատասխան՝ Նազարյանը նշել է, որ «Էլեկտրացանցերը» միակ ընկերությունն է, որի շահութաբերության նորման օրենսդրորեն է նշված՝ 2002 թվականից ի վեր, երբ ցանցերը սեփականաշնորհվեցին: «Այդ պատճառով եթե ցանկանում եք այստեղ ինչ-որ բան փոխել, պետք է օրենքը փոխել»,- նշել է Նազարյանը: