Թուրքիան ՆԱՏՕ–ի պաշտպանության նախարարների խորհրդակցության ժամանակ չի կարողացել խանգարել Էգեյան ծովում ՆԱՏՕ–ի գործողությունների շարունակությանը։ Այս մասին ասել է Հունաստանի ազգային պաշտպանության նախարար Պանոս Կամմենոսը՝ թուրքական կողմին մեղադրելով սադրանքների եւ անկայունության մթնոլորտ ստեղծելու մեջ, փոխանցում է «ՌԻԱ Նովոստի»–ն։
«Ես ուզում եմ շնորհավորել ՆԱՏՕ–ի պատվիրակության անդամ հույն զինվորականներին ու դիվանագետներին այն ջանքերի համար, որոնք նրանք գործադրել են Էգեյան ծովում ՆԱՏՕ–ի գործողությունների շարունակության համար՝ չնայած Թուրքիայի հակազդեցությանը»,– ասել է նախարարը։
«Կարեւոր է, որ ՆԱՏՕ–ի ներկայությունը տարածաշրջանում բացի այն, որ արդյունավետ միջոց դառնա փախստականների հոսքը զսպելու համար, այլ նաեւ օգնի մեր դաշնակիցներին տեսնել Թուրքիայի սադրանքները, միջազգային նորմերի ոտնահարումներն ու դաշինքի երկու անդամների միջեւ անկայունություն ստեղծելու փորձերը»,– ասել է հույն նախարարը։