Ռուսաստանի զսպման ՆԱՏՕ-ի ծրագրի շրջանակում Գերմանիայի զինված ուժերը 2017-ին Լիտվա կուղարկեն մինչեւ 600 զինծառայող, նաեւ Leopard 2 տանկեր, հայտնում է DW–ը։
Փորձագետները դա գնահատում են որպես հստակ ազդանշան, որ Գերմանիան լուրջ է վերաբերվում Ռուսաստանի կողմից ռազմական սպառնալիքի կապակցությամբ Բալթյան երկրների ու Լեհաստանի մտահոգություններին։
ՆԱՏՕ-ի գլխավոր քարտուղար Ենս Սթոլթենբերգը հայտնել է, որ իր այս որոշումով ՆԱՏՕ-ն ուզում է ցույց տալ իր պաշտպանունակությունը։ Նույն նպատակն է հետապնդում նաեւ տարածաշրջանում տանկերի ու հրետանու նման ծանր սպառազինությունների տեղակայումը, նույնիսկ եթե ՆԱՏՕ-ի անդամ երկրների համար անմիջական սպառնալիքի մասին խոսք չկա, նշել է Սթոլթենբերգը։ Նույնատիպ հայտարարություն է արել նաեւ Գերմանիայի պաշտպանության նախարար Ուրսուլա ֆոն դեր Լյայենը։ Նա ՆԱՏՕ-ի արեւելյան գործընկերներին ցուցաբերվող աջակցությունն անվանել է «համաչափ ու պաշտպանական»։
Իսկ Բունդեսթագում Ձախ կուսակցության խմբակցության ղեկավար Սրա Վագենկնեխտը կտրուկ քննադատել է Բեռլինի ծրագրերը։ «Ռուսաստանի հետ սահման գերմանական տանկեր ուղարկելը նշանակում է մոռանալ պատմությունը ու նոր քայլ անել Ռուսաստանի հետ հարաբերություններում էսկալացիայի ուղղությամբ»,- ասել է նա։