ԱՄՆ, Հարավային Կորեայի ու Ճապոնիայի բարձրաստիճան պաշտոնյաները պայմանավորվել են ակտիվացնել ջանքերը, որպեսզի ստիպեն ԿԺԴՀ-ին հրաժարվել միջուկային ծրագրից, հայտնում է «Ամերիկայի ձայնը»։
«Հյուսիսային Կորեայի կողմից անվտանգության համար սպառնալիքը նոր մակարդակ է բարձրացել,- նշել է Ճապոնիայի փոխարտգործնախարար Սինսուկե Սուգիյաման,- Ես կարծում եմ, որ մեզ ուրիշ քայլեր են պետք, որոնք թույլ կտան մեզ համապատասխան գործել»։
Սուգիյաման այս հայտարարությունն արել է Տոկիոյում, որտեղ հանդիպել է ԱՄՆ պետքարտուղարի տեղակալ Էնթոնի Բլինկենի ու Հարավային Կորեայի փոխարտգործնախարար Լիմ Սոն Նամի հետ։
«Մեր քաղաքականություն չի փոխվել,- նշել է Բլինկենը,- Մենք չենք համակերպվի, որ ԿԺԴՀ-ն միջուկային տերություն դառնա ու միջուկային զենք ունենա»։ Նա հավելել է, որ ջանքերի նպատակն է ԿԺԴՀ-ին վերադարձնել բանակցային սեղանի շուրջ, բարեխիղճ երկխոսոթյուն վարելու նպատակով։