Առաջիկայում Հայաստանի եւ Ադրբեջանի նախագահաների հանդիպում տեղի չի ունենա: Այս մասին, այսօր՝ հոկտեմբերի 27-ին, ՀՀԿ ԳՄ նիստից հետո ասաց ԱԺ փոխխոսնակ Էդուարդ Շարմազանովը. « Կարող եմ ասել, որ առաջիկայում նման հանդիպում նախատեսված չէ: Իսկ ապագայում հնարավոր է, թե չէ՝ կապրենք կտեսնենք»:
ԱԺ փոխխոսնակը նշեց, որ հայկական կողմը ԼՂ հարցում ունի իր հստակ կարծիքը, որը չի փոխվել եւ չի փոխվելու:
«Մենք ունենք մեր հստակ կարծիքը, այն չի փոխվել, պետք է Վիեննայի եւ Պետերբուրգի պայմանավորվածությունները կյանքի կոչվեն: Ադրբեջանը դժբախտաբար ոչ թե իրականացնում է այդ պայմանավորվածությունները, այլ՝ արհամարհում: Իրականացրեց դիվերսիոն գործողություն, երեկ մենք ունեցանք զոհ սահմանին: Կարծում եմ, որ միջազգային հանրությունն ու առաջին հերթին հարգարաժան մեր համանախագահ գործընկերները պետք է հասցեական գնահատականով հանդես գան եւ Ադրբեջանին ստիպեն հարգել իր ստանձնած պարատականությունները: Մենք ունենք հստակ դիրքորոշում՝ ԼՂՀ ժողովուրդը պետք է լինի ինքն իր դարբինը, ԼՂՀ-ն պետք է անկախ պետություն լինի եւ որեւէ կարգավիճակով չի կարող լինել Ադրբեջանի կազմում: Մեր կարծիքն հետեւյալն է՝ դեպի անցյալ հնարավոր չէ, մենք պետք է դեպի առաջ գնանք եւ ապահովենք ԼՂՀ միջազգային ճանաչումը»,-ասաց նա: