Քաղաքականության մեջ պետք է լինի կոռեկտություն եւ բոլոր ոչ կոռեկտ գնահատականները պետք է լինեն անցյալում: Այս մասին այսօր՝ հոկտեմբերի 27-ին, ԳՄ նիստից հետո լրագրողների հետ զրույցում ասաց ԱԺ փոխխոսնակ Էդուարդ Շարմազանովը՝ պատասխանելով հարցին, թե ինչպես են Հայաստանի հանրապետական կուսակցությունում վերաբերվում Գագիկ Ծառուկյանի քաղաքական դաշտ վերադառնալուն:
«Քաղաքականության մեջ պետք է լինի կոռեկտություն, համերաշխություն, հանդուժողականություն եւ քաղաքական մշակույթ, բոլոր ոչ կոռեկտ գնահատականները պետք է լինեն անցյալում եւ հերիքա հետ նայեք, վզներդ ծուռ կմնա, նայեք առաջ, իսկ ապագան, կարծում եմ ավելի գեղեցիկ ու համերաշխ կլինի»,-ասաց նա:
Էդուարդ Շարմազանովը նշեց, որ որեւէ բան չունի ասելու Գագիկ Ծառուկյանի՝ լրագրողների հետ զրույցում արած հայտարարության վերաբերյալ, թե ինքը ներողամիտ է. «Ներողամտության հետ կապված արդեն մեկնաբանություններ տրվել են: Ձեր հարցերը տվեք այն մարդկանց, որոնք ներելու եւ ներվելու խնդիր ունեն, ես ոչ ներվելու, ոչ էլ ներելու խնդիր չունեմ»:
