Քաղաքականություն վերադարձի հարցը հենց ԲՀԿ նախկին ղեկավար Գագիկ Ծառուկյանը պետք է կայացնի: Այս մասին հոկտեմբերի 28-ին Հայաստանի Ազգային ժողովում կայացած ավանդական ճեպազրույցների ժամանակ հայտարարել է ՕԵԿ խմբակցության քարտուղար, «Հայկական վերածնունդ» կուսակցության ղեկավարներից Մհեր Շահգելդյանը:
Նրա խոսքով՝ Գագիկ Ծառուկյանն ինքը պետք է հաշվի առնի բոլոր խնդիրները, գործոնները, եւ վերջնական որոշում կայացնի: «Իսկ մեր ձայները՝ մեր ձայներն են եւ պայմանավորված են աշխատանքով եւ գործունեությամբ: Ընտրական գործընթացը մրցակցություն է, բայց մենք մտավախություն չունենք, որ ինչ-որ մեկը կվերադառնա եւ կտանի մեր ձայները: Մեր աշխատանքի գնահատականն ընտրությունների ժամանակ կտա մեր ընտրողը»,- նշել է Շահգելդյանը:
Հիշեցնենք, որ անցյալ տարի նախագահ Սերժ Սարգսյանի սուր քննադատությունից հետո քաղաքականությունից հեռացած Գագիկ Ծառուկյանն օրերս չէր բացառել ակտիվ քաղաքականություն իր վերադարձի հնարավորությունը: