Թեեւ ԵՄ-Հայաստան նոր համաձայնագրի շուրջ բանակցություններում առկա խնդիրները որակվում են որպես տեխնիկական, սակայն դրանք այնքան էլ տեխնիկական չեն: Այս մասին, այսօր՝ հոկտեմբերի 28-ին, լրագրողների հետ հանդիպման ժամանակ նշել է «Միջազգային և անվտանգության հարցերի հայկական ինստիտուտի» հիմնադիր-նախագահ, քաղաքագետ Ստյոպա Սաֆարյանը:

Նրա խոսքով, 3,5 տարի է , ինչ Հայաստան ու ԵՄ-ն փորձում են վերասահմանել իրենց հարաբերությունները, դրանից առաջ եւս 3,5 տարի չափազանց խորը բանակցություններ էին տեղի ունեցել Ասոցացման համաձայնագրի շուրջ. «Եթե խնդիրները իսկապես լինեին տեխնիկական, պետք է մինչ այդ պարզ լինեին մեր պարտավորությունների շրջանակը: Եթե այսքան ժամանակահատվածում անհնար է «քոփի-փեսթ»-երով թղթի վրա բերել այն ամենը, ինչ բանակցվել է 3,5 տարի, հասկանալի պետք է դառնա, որ խոչընդոտները ոչ թե տեխնիկական են, այլ քաղաքական»:

Հարցին, թե արդյոք ԵՄ-ի հետ բանակցությունների մասին Մոսկվային տեղեկացնելը բավարար է, որ այդ համաձայնագիրը ստորագրվի, Սաֆարյանն արձագանքեց. «Կարծում եմ՝ ոչ, որովհետեւ ի սկզբանե խնդիրը պայմանավորված է եղել «Արեւելյան գործընկերության» ծրագրի նկատմամբ ՌԴ վերաբերմունքով: 2013-ին Ռուսաստանն իր քայլերով փորձեձց սպանել «Արեւելյան գորընկերության» քաղաքականությունը:

Ես այնքան էլ վստահ չեմ, որ այս տարվանից սկսված բանակցությունները կարող են հիմք ծառայել դրա ստորագրման համար»: