ՀՀ գյուղատնտեսության նախարարությունում այսօր տեղի է ունեցել Հայաստանի խաղողագործության եւ գինեգործության հիմնադրամի հոգաբարձուների խորհրդի հերթական նիստը, որը վարում էր խորհրդի նախագահ, ՀՀ գյուղատնտեսության նախարար Իգնատի Առաքելյանը:
«Այսօր մենք հավաքվել ենք քննարկելու, թե ինչ ակնկալիքներ ունենք այս հիմնադրամից, վեր հանել այն խնդիրները, որոնք առկա են այս ոլորտում եւ առաջարկել դրանց լուծման ուղիները»,-ողջունելով նիստի մասնակիցներին` նշել է նախարար Իգնատի Առաքելյանը:
Անդրադառնալով հիմնադրամի գործունեության հիմնական նպատակներին` նախարարը շեշտել է, որ արդյունավետ աշխատանքի ապահովման համար այն պետք է ակտիվորեն համագործակցի ոչ միայն պետական, այլեւ մասնավոր հատվածի հետ: Նախարարը նշել է, որ հիմնադրամի աշխատանքներում ընդգրկեն նաեւ Խաղողագործների միության անդամներին:
Ներկայացնելով խաղողագործության բնագավառում ՀՀ գյուղատնտեսության նախարարության կողմից իրականացվող ծրագրերը` նախարարը, մասնավորապես, տեղեկացրել է, որ Պարենի եւ գյուղատնտեսդության կազմակերպության (FAO) կողմից ՀՀ ԳՆ «Երկրագործության գիտական կենտրոն» ՊՈԱԿ-ում փորձնական «Ֆիլոքսերավարակի նկատմամբ կայուն պատվաստակալների աճեցման» ծրագրով հիմնվել է տնկարան, որում ներկայացված են խաղողի ֆիլոքսերակայուն տնկիներ:
Այնուհետեւ խորհրդի անդամները ներկայացրել են առաջարկներ խաղողագործության եւ գինեգործության ոլորտների զարգացման վերաբերյալ: Մասնավորապես, նրանք ընդգծել են Հայաստանում գինեգործական տուրիզմի խթանման կարեւորությունը` նշելով, որ այսօր մեր երկրում ստեղծվել են բավարար նախադրյալներ գինու տուրիզմի զարգացման համար:
Խորհրդակցության ընթացքում անդրադարձ է կատարվել նաեւ խաղողի մթերման կազմակերպմանը: Շեշտելով, որ այսօր իսկ հարկավոր է միջոցներ ձեռնարկել հաջորդ տարվա ընթացքում մթերումների հետ կապված խնդիրներից խուսափելու համար` նախարարն առաջարկել է, որպեսզի խաղող վերամշակող ընկերությունները գալիք տարվա մարտ-ապրիլին կազմեն խաղողի մթերման պահանջարկի վերաբերյալ հաշվարկներ, սկսեն պայմանագրեր կնքել խաղողագործների հետ, որպեսզի նախապես հնարավորություն ունենան անհրաժեշտության դեպքում միջոցներ ձեռնարկել խաղողի ավելցուկի իրացման խնդիրը լուծել ուղղությամբ:
Հանդիպմանը քննարկվել են Հայաստանում գինու մշակույթի ձեւավորման, զարգացման եւ առաջմղման հարցերը: Այդ նպատակով նախատեսվել է Երեւանի կենտրոնում կազմակերպել հայկական գինիների ցուցահանդես-համտես եւ պատրաստել «Հայաստանը` գինու պատմական երկիր» խորագրով տեսանյութեր:
Անդրադարձ է կատարվել նաեւ օրենսդրական դաշտի բարելավման խնդրին:
Հիմնադրամի հիմնական նպատակն է նպաստել Հայաստանում խաղողագործության զարգացմանը, հայկական գինու արտադրության եւ արտահանման ծավալների մեծացմանը, ինչպես նաեւ միջազգային շուկայում տեղական գինեգործական արտադրանքի վարկանշի բարձրացմանն ու հանրայնացմանը: