Տնտեսական կապակցվածության խթանումը եւ եվրասիական տրանսպորտային կապերի եւ հաղորդակցության զարգացումը հոկտեմբերի 26-27-ին Երեւանում ԵԱՀԿ գրասենյակի կողմից՝ ՄԱԿ-ի Եվրոպական տնտեսական հանձնաժողովի (ԵՏՀ) «Եվրասիական տրանսպորտային կապեր» (ԵԱՏԿ) ծրագրի շրջանակներում կազմակերպված երկօրյա հանդիպման ուշադրության կենտրոնում էին:
Միջոցառմանը մասնակցել են ներկայացուցիչներ պետական կառույցներից, մասնավոր հատվածից, մասնագիտացված տրանսպորտային կազմակերպություններից եւ փորձագետներ՝ Հայաստանից, Հունաստանից, Իրանից, Լեհաստանից, Ռուսաստանից, Սինգապուրից, Մակեդոնիայի նախկին հարավսլավական հանրապետությունից:
Նրանք քննարկեցին եվրասիական ուղիների ենթակառուցվածքային նախաձեռնություններին եւ տարանցիկ ծրագրերին վերաբերվող վերջին զարգացումները՝ մասնավորապես «Մետաքսյա ճանապարհ» (The Silk Road) եւ Հյուսիս-Հարավ ճանապարհային միջանցքի ներդրումային ծրագիրը:
Մասնակիցները քննարկեցին ՄԱԿ-ի ԵՏՀ ԵԱՏԿ ծրագրի երրորդ փուլի հաշվետվության նախագիծը, որը հիմք կհանդիսանա քաղաքականության համակարգման եւ գործողությունների՝ շահագործելու եւ տնտեսապես գրավիչ դարձնելու եվրասիական առեւտրային եւ տրանսպորտային ցամաքային կապերը: Մասնակիցները համաձայնեցին, որ մասնավոր-պետական գործընկերություններն ու քաղաքական աջակցությունն անհրաժեշտ են՝ տարածաշրջանային տնտեսական աճի խթանման համար, կայունության եւ անվտանգության համար՝ իրավական համաձայնագրերի բարեփոխման միջոցով, պարզեցնելով ընթացակարգերը եւ վերացնելով սահմանափակող կանոնները:
ԵԱՀԿ երեւանյան գրասենյակի տնտեսական եւ բնապահպանական ծրագրի ղեկավարի պաշտոնակատար Դեյվիդ Գուլլետտն ասաց. «ԵԱՀԿ-ն գիտակցում է Եվրասիական տրանսպորտային կապերի ծրագրի կարեւորությունը՝ տարածաշրջանում տնտեսական զարգացման եւ սոցիալական կայունության համար»:
«ՄԱԿ-ի ԵՏՀ-ն նպատակ ունի նպաստել Եվրոպայի եւ Ասիայի տնտեսական զարգացմանը՝ խթանելով տրանսպորտային եւ առեւտրային կապերը եւ դարձնելով դրանք տնտեսապես շահավետ»,-ասաց ՄԱԿ-ի Եվրոպական տնտեսական հանձնաժողովի Կայուն տրանսպորտային վարչության ներկայացուցիչ Միրոսլավ Յովանովիչը:
ԵԱՀԿ տնտեսական եւ բնապահպանական հարցերով համակարգողի գրասենյակի տնտեսական հարցերով պատասխանատու Զուխրա Բեկտեպովան ընդգծեց, որ տրանսպորտային եւ մաքսային ընթացակարգերի եւ կանոնակարգերի կանխատեսելիությունն ու ներդաշնակեցումը պահանջում է ոչ միայն տեխնիկական «նոու-հաու», այլ նաեւ քաղաքական կամք եւ համագործակցություն:
ՀՀ Ազգային ժողովի արտաքին հարաբերությունների մշտական հանձնաժողովի նախագահԱրտակ Զաքարյանը ը կարեւորեց տարածաշրջանային տնտեսական ինտեգրումը, որտեղ «եվրասիական տրանսպորտային եւ արդյունավետ լոգիստիկայի շղթաների կատարելագործումն ու զարգացումը կենսականորեն կարեւոր են»:
Միջոցառմանը աջակցել են ԵԱՀԿ տնտեսական եւ բնապահպանական հարցերի համակարգողի գրասենյակը եւ Միացյալ Ազգերի Կազմակերպության Եվրոպայի տնտեսական հանձնաժողովը (ՄԱԿ ԵՏՀ):
ԵԱՀԿ-ն տրամադրել է քաղաքական եւ գործնական աջակցություն ՄԱԿ-ի ԵՏՀ ԵԱՏԿ ծրագրին 2006թ. ի վեր: