Այսօր՝ դեկտեմբերի 17-ին ՀՀ կառավարությունում տեղի է ունեցել «Քենդլ» նախագծի համակարգող խորհրդի հերթական նիստը, որը վարել է վարչապետ, խորհրդի նախագահ Տիգրան Սարգսյանը։
Կառավարության մամուլի ծառայությունից NEWS.am-ին հայտնում են, որ օրակարգի առաջին հարցով խորհրդի անդամներն ի գիտություն են ընդունել Ռուսաստանի Դաշնության, Ֆրանսիայի, Գերմանիայի եի Չինաստանի հետ բանակցությունների արդյունքների եւ նախագծի առաջընթացի համար անհրաժեշտ հետագա քայլերի վերաբերյալ ՀՀ կրթության և գիտության նախարարության գիտության պետական կոմիտեի նախագահ Սամվել Հարությունյանի զեկույցը:
Նիստում ներկայացվել է «Քենդլ» նախագծի իրականացման առաջին փուլի` Գերմանիայի կողմից տրամադրված սարքավորման հիման վրա AREAL լազերային բարձր հաճախականային գիտահետազոտական գծային արագացուցչի կառուցման հարցը։
Տիգրան Սարգսյանը հանձնարարել է փոխվարչապետ Արմեն Գեւորգյանին` ԿԳՆ գիտության պետական կոմիտեի ու ՀՀ կառավարությանն առընթեր պետական գույքի կառավարման վարչության հետ համատեղ նախապատրաստել եւ կառավարության քննարկմանը ներկայացնել «Քենդլ» կենտրոնի շենքի շինարարության համար համապատասխան տարածք հատկացնելու մասին որոշման նախագիծ:
«Քենդլ» նախագծի իրականացման նախապատրաստական փուլի ղեկավարի թեկնածության վերաբերյալ ծավալված քննարկման արդյունքում ղեկավար է ընտրվել Երեւանի պետական համալսարանի «Սինքրոտրոնային ճառագայթման օգտագործմամբ գիտահետազոտական կենտրոն» ԳՀԻ տնօրեն Վասիլի Ցականովը: