Իշխող կոալիցիան հետեւողականորեն հանդես չի գալիս այն սկզբունքների եւ խնդիրների լուծման ուղղությամբ, որոնք նա հռչակել է, ուստի կոալիցիայի գործունեությունը իրավիճակային եւ ապագայի համար ոչ խոստումնալից: Այսպիսի գնահատականով է հանդես եկել Հայաստանի ժողովրդավարական ազգային միությունը (ՀԺԱՄ), որը երկար ժամանակ լռություն էր պահպանում:
ՀԺԱՄ-ը վերջին շրջանի վերադասավորումները գնահատել է որպես քաղաքական մանիպուլյացիաներ, որոնք չնայած հասարակության մի մասի մեջ դրական սպասումներ են առաջացնում, այնուհանդերձ, իրատեսական չեն:
«Հայաստանի ղեկավար մարմիններում շարունակում են պաշտոնավարել հնացած քաղաքական դեմքեր, ովքեր սպառել են ե՜ւ իրենց մասնագիտական, ե՜ւ քաղաքական որակները, կոմպետենտ չեն ոչ Հայաստանի ներքին խնդիրների եւ ոչ էլ ժամանակակից աշխարհի առաջադրած պահանջների տեսանկյունից»,-ասվում է կուսակցության հայտարարության մեջ:
Անդրադառնալով նախագահ Սերժ Սարգսյանի ՀՀԿ 20-ամյակի ելույթում տեղ գտած «Զրո հանդուրժողականություն կոռուպցիայի,կաշառակերության եւ բյուջետային միջոցների մսխման հարցում» արտահայտությանը ՀԺԱՄ վարչության նախագահ Վահրամ Մկրտչյանը նշել է, որ եթե մոտ ժամանակներս նախագահը չհրավիրի համապատասխան մարմինների խորհրդակցություն եւ չտա համապատասխան հրահանգներ, որոնք կկրեն ոչ թե դեկլարատիվ բնույթ, այլ կտանեն իրատեսական քայլերի, ապա սա եւս կդիտվի իշխանությունների կողմից իրականացվող քաղաքական մանիպուլյացիայի մի մասը:
«Վստահ ենք, որ դատապարտված է այն իշխանությունը, որի բոլոր խոստումները եւ ծրագրերը պարզապես խոստումներ եւ անիրական ծրագրեր են»,- ասել է նա: