Հայաստանի նախագահ Սերժ Սարգսյանը ցավակցական հեռագիր է հղել Ճապոնիայի կայսր Ակիհիտոյին։
Նախագահը նամակում մասնավորապես նշված է.
«Ձերդ Մեծություն,
Խորապես ցնցված եմ Ճապոնիան պատուհասած ողբերգական տարերային աղետի բոթից։ Անկեղծ ցավակցություն եմ հայտնում Ձեզ եւ Ճապոնիայի բարեկամ ժողովրդին՝ բազմաթիվ մարդկային զոհերի եւ ավերածությունների կապակցությամբ։
Վստահ եմ, որ Ճապոնիայի իշխանությունների կողմից ձեռնարկված վճռական միջոցառումները թույլ կտան հաղթահարել այս դաժան փորձությունը։ Վստահ եղեք, որ այս ծանր պահին Հայաստանը զորավիգ է բարեկամ Ճապոնիային, եւ մեր անկեղծ ցանկությունն է համեստ կարողությունների չափով օժանդակել այս սարսափելի աղետի հետեւանքների վերացմանը:
Կիսելով Ձեր և Ճապոնիայի ժողովրդի վիշտն ու ցավը` զոհվածների հարազատներին եւ մերձավորներին մաղթում եմ տոկունություն և ոգու արիություն»։
Ինչպես արդեն նշել է NEWS.am-ը, ցունամիով ուղեկցված երկրաշարժը Ճապոնիայում տեղի է ունեցել 2011 թվականի մարտի 11-ին։ Սեյսմակայանները գրանցել են 8,9 մագնիտուդ հզորություն։ Վերջին տվյալներով, տարերքի զոհերի թիվը կազմել է ավելի քան 300 մարդ։ Հայաստանի ԱԳ նախարարության տվյալներով, Ճապոնիայում գտնվող Հայաստանի 30 քաղաքացիները չեն տուժել։