Թուրքիայում Նովրուզ բայրամի տոնակատարությունների ընթացքում շարունակվում են բախումներ ոստիկանության եւ քուրդ բնակչության միջեւ:
Թուրքական Beyazgazete-ի փոխանցմամբ` Թուրքիայի հարավ-արեւելյան հիմնականում քրդաբնակ Շրնաքի Սիլոպի շրջանում Նովրուզի տոնակատարությունները կրկին բախումներով են ուղեկցվել: Այստեղ տոնակատարության մասնակիցների նկատմամբ ոստիկանությունը ջրցան մեքենաներ եւ արցունքաբեր գազ է օգտագործել: Տոնակատարության մասնակիցներից է եղել քրդական «Խաղաղություն եւ ժողովրդավարություն» կուսակցության կին պատգամավոր Սաբահաթ Թունջելը, ով ընդդիմացել է ոստիկանության բիրտ գործողություններին: Նա զայրացած մոտեցել է Սիլոպի ոստիկանության բաժանմունքներից մեկի պետին եւ ապտակել. «Ի՞նչ եք անում, երեխաներին այդ ի՞նչ եք անում: Մի շարք վիրավորներ կան: Դուք հաշիվ եք տալու ձեր արածի համար»,-բղավել է Սաբահաթ Թունջելը:
Իսկ ահա Թուրքիայի Մերսին քաղաքում Նովրուզի տոնակատարության ընթացքում հնչեցվել է Թուրքիայի հանրապետության բոլոր նախագահների անունները, ովքեր մերժողական քաղաքականություն են վարել քրդերի նկատմամբ: Հավաքվածները ամեն նախագահի անունը լսելիս` սկսած Աթաթուրքից, բարձր սուլել են ի նշան բողոքի: Մերսինի տոնակատորությունը վարել է «Խաղաղություն եւ ժողովրդավարություն» կուսակցության պատգամավոր Սըրրը Սաքըքը: