Մարտի 1-ի դեպքերի քննությունն այս ընթացքում չի դադարել եւ շարունակում է մնալ ուշադրության կենտրոնում: Երեք տարի շարունակ թե քննությունը, թե արդարադատության համակարգի ցավոտ հարցերը եղել եւ մնում են Հայաստանի իշխանությունների ուշադրության կենտրոնում: Այդ մասին հայտարարել է Հայաստանի Ազգային Ժողովի փոխնախարար Սամվել Նիկոյանը NEWS.am-ի թղթակցի խնդրանքով մեկնաբանելով Հայաստանի նախագահ Սերժ Սարգսյանի հայտարարությունը` մարտի 1-ի հանցագործությունների հետաքննությանը նոր խթան հաղորդելու անհրաժեշտության մասին:
Նիկոյանը, ով ի դեպ, խորհրդարանական ժամանակավոր հանձնաժողովի նախագահն էր, նշել է, թե այս ընթացքում Սերժ Սարգսյանն անընդհատ գործով է ցույց տվել, որ քաղաքական խնդիրների լուծման քաղաքակիրթ եւ համագործակցային տարբերակի կողմնակիցն է: «Կարծում եմ` սա հասկացել են նաեւ ընդդիմադիր դաշտում, եւ կարծես արդեն գիտակցվում է, որ անիմաստ է վերջնագրերի լեզվով կամ ուժի դիրքերից խոսել իշխանության հետ:
ՀԱԿ առաջնորդի արտահայտած այն միտքը, թե քինգ-բոքսինգի փոխարեն պետք է շախմատ խաղալ, մենք ընկալում ենք որպես նախագահի կողմից բազմիցս հնչեցրած քաղաքակիրթ երկխոսության կոչերի ընդունում: Սա, իհարկե, դրական է»,- հայտարարել է փոխնախագահը եւ հավելել. «Կարծում եմ` քաղաքական գործընթացները կշարունակեն դրական հունով ընթանալ, քանի որ գիտեմ, որ շախմատ խաղալուց չպետք է մոռանալ, թե ով է ՀՀ շախմատի ֆեդերացիայի նախագահը եւ ում կողքին են Հայաստանի լավագույն շախմատիստները»:
Նշենք, որ նախօրեին տեղի ունեցած դատաիրավական համակարգի բարեփոխումների հարցերով խորհրդակցության ժամանակ Հայաստանի նախագահ Սերժ Սարգսյանը հայտարարել էր 2008 թվականի մարտի 1-ի իրադարձությունների բացահայտման գործընթացին նոր իմպուլս եւ ակտիվացում հաղորդելու անհրաժեշտության մասին։