Հայաստանի իշխանությունները բավարար քաղաքական կամք ունեն, որպեսզի առաջ շարժվեն Լեռնային Ղարաբաղի համաձայնության հարցում, թեեւ մենք հասկանում ենք, որ դա հեշտ չէ: Այդ մասին BBC հեռուստաընկերությանը տված հարցազրույցում ասել է վարչապետ Տիգրան Սարգսյանը:
«Մենք հույս ունենք, որ մեր ադրբեջանցի գործընկերները եւս կդրսեւորեն քաղաքական կամք»,- ասել է նա:
Անդրադառնալով Թուրքիայի հետ հարաբերությունների կարգավորման հարցին` վարչապետը հայտարարել է, որ վերջին 20 տարիների ընթացքում Հայաստանը ցուցաբերել է հստակ քաղաքական դիրքորոշում այդ հարցում: Երեւանը պատրաստ է կարգավորել հարաբերությունները հարեւան երկրների հետ` առանց որեւէ նախապայմանների: «Սակայն վերջին իրադարձությունները ցույց են տալիս, որ Թուրքիան պատրաստ չէ անել նույնը»,-ասել է նա:
Տ. Սարգսյանի կարծիքով` Թուրքիայի քաղաքական կշիռը կաճի միայն այն դեպքում, երբ Անկարան սկսի հետեւել միջազգային խաղի կանոններին:
«Հարեւանների հետ առկա խնդիրները խարխլում են այդ երկրի դիրքորոշումը: Անկարան պետք է շարունակի իրականացնել ժողովրդավարական բարեփոխումներ ԵՄ-ին անդամակցելու ճանապարհին, եւ այս դեպքում մենք պատրաստ ենք կառուցել կայուն հարաբերություններ հարեւան երկրների հետ»,- եզրափակել է Տիգրան Սարգսյանը:
