Լեռնային Ղարաբաղում չէին բացառում այն հնարավորությունը, որ Կազանում կայացած Հայաստանի, Ադրբեջանի եւ Ռուսաստանի նախագահների եռակողմ հանդիպումը բեկումնային չի լինի ղարաբաղյան հիմնախնդրի կարգավորման գործընթացում: NEWS.am-ի թղթակցի հետ զրույցում նման կարծիք հայտնեց ԼՂՀ նախագահի մամլո քարտուղար Դավիթ Բաբայանը:
Նա նշեց, որ նախագահների կազանյան հանդիպման շուրջ լավատեսական կանխատեսումները որոշակի կասկած էին առաջացնում Բաքվի ապակառուցողական դիրքորոշման ֆոնին: Սակայն, ըստ նրա, համանախագահների բոլոր այդ լավատեսական հայտարարություններն ուղղված են բանակցային գործընթացի պահպանմանը:
«Այդ գնահատականները, դրանց հաջորդող մեկնաբանությունները պաշտպանում են բանակցային գործընթացը, եւ ԵԱՀԿ Մինսկի խմբի համանախագահները գերազանց գիտակցում են դա»,-նշեց նա` միաժամանակ ընդգծելով, որ բանակցային գործընթացը 2012, 2013 եւ 2014 թվականներին կմտնի պասիվ փուլ:
