Հանրապետության հրապարակում քիչ առաջ կայացավ անկախության 20-րդ տարեդարձի մեծ շքերթի գլխավոր փորձը:
Պաշտպանության նախարարը, մոտենալով յուրաքանչյուր ստորաբաժանմանը, ողջունում եւ շնորհավորում էր, ինչին ի պատասխան` զորահանդեսի մասնակից ստորաբաժանումները ողջունում էին «Ուռա» բացականչություններով, բացառությամբ մեկ` Հայաստանի զինված ուժերի հոգեւոր սպասավորների ստորաբաժանման, որը միահամուռ պատասխանեց «Աստված պահպանի հայոց անկախությունը» բացականչությամբ: Զորահանդեսին մասնակցում էին Հայաստանի բանակի բոլոր 5 կորպուսները` իրենց հրամանատարների ղեկավարությամբ: Կային ստորաբաժանումներ Լեռնային Ղարաբաղի պաշտպանության բանակից, Վազգեն Սարգսյանի անվան ռազմական ինստիտուտից, ՌԴ սահմապահ ծառայությունից, ռազմական ոստիկանությունից:
Շքերթին մասնակցում էին նաեւ Մոնթե Մելքոնյանի անվան ռազմական ուսումնարանը, խաղաղապահների գումարտակը եւ ազատամարտիկների առանձին ստորաբաժանում: Իսկ զորահանդեսին մասնակից հետախուզական մեքենաների վրա կային ռազմական համազգեստներով կանայք: Քայլերթից հետո տեղի ունեցավ օդանավերի թռիչքը, որոնցից հայոց եռագույնի գույներով հետագիծ թողեցին իրենց ետեւից: Անցան նաեւ ուղղաթիռների մի քանի խմբեր, որին հաջորդեց զրահատեխնիկայի երթը: Դրան մասնակցում էին մասնակցում են տանկային, հրթիռային, հակաօդային պաշտպանության ստորաբաժանումները:
Հատկապես աչքի էին ընկնում հայկական արտադրության անօդաչու ինքնաթիռները, որոնք իրենց տեխնիկա-տակտիկական բնութագրերով բացարձակապես չեն զիջում արտասահմանում արտադրվող նմանօրինակ անօդաչու ինքնաթիռներին: Ներկայացվեցին նաեւ C-300 զենիթահրթիռային համալիրները:
Վազգեն Սարգսյանի անվան ռազմական ինստիտուտի կուրսանտները հրապարակի գորգի վրա ցույց տվեցին շարային վարժություններ, որոնցից տպավորված հրամանատարությունը, հասարակ քաղաքացիները ծափահարեցին առանձնակի ոգեւորությամբ: Վերջում ռազմական շքերթը եզրափակեց ՊՆ փողային նվագախումբը` կատարելով «Էրեբունի-Երեւան» երգը: