Հայաստանի 2012թ. պետբյուջեի ցուցանիշները զգալիորեն զիջում են նախագահ Սերժ Սարգսյանի 2008թ. նախընտրական ծրագրով նպատակադրված չափերին: Այս մասին նոյեմբերի 10-ին, լրագրողների հետ հանդիպման ժամանակ հայտարարել է Հայաստանի Կենտրոնական բանկի նախկին նախագահ, ՀԱԿ-ի անդամ Բագրատ Ասատրյանը:
Նա հիշեցրել է, որ, համաձայն նախընտրական ծրագրի, 2012թ. երկրի ՀՆԱ-ն ծրագրվում էր հասցնել 5 մլրդ 570 մլն դրամի (2012թ. բյուջեի նախագծում այն 4 միլիարդ 218 միլիոն է): Միջին կենսաթոշակը 2012 թվականին պետք է կազմեր 39 498 դրամ, իսկ 2012թ. պետբյուջեի նախագծով նշված է 31 254 դրամ:
Իր հերթին, Ազգային ժողովի պատգամավոր, ՀՀԿ անդամ, տնտեսական հարցերի մշտական հանձնաժողովի նախագահ Վարդան Այվազյանը կոչ է արել չանտեսել համաշխարհային տնտեսական ճգնաժամը, որպես ոչ ձեռնտու փաստարկ. «Ստացվում է, Հայաստանը գտնվում է Գալակտիկայի ամենահեռավոր անկյունում, եւ բոլոր գլոբալ գործընթացները մեզ վրա որեւէ կերպ չե՞ն անդրադառնում: Այդպե՞ս է: Ստացվում է 2010թ. 14.4% անկումը միայն մե՞ր մեղքն է: Ճգնաժամը կապ չունի՞, կողքո՞վ է անցել: Է՞լ ինչում ենք մեղավոր», - հարցրել է Այվազյանը:
Խոսելով պետբյուջեի նախագծի մասին` նա նշել է վերջին տարիներին ավելացող եւ 2012թ. եւս ծրագրված հարկերի աճի մասին: «Երեք տարում եկամուտներն աճել են 240 մլրդ դրամով: Այնպես որ, թող որեւէ մեկին չթվա, որ պետբյուջեի եկամուտները անուշադրության են մատնվել», - ասել է Այվազյանը:
Հիշեցնենք, որ 2010թ. հարկերի եւ տուրքերի հարաբերակցությունը ՀՆԱ-ի նկատմամբ կազմել է 16,88%, 2011թ. ակնկալվում է 16,79%, 2012թ.-ին նախատեսվում է հասցնել 17,36%-ի:
Իր հերթին Բագրատ Ասատրյանն ասել է, որ 50 - 60 մլրդ դրամի հարկային եկամուտների այդ աճը չի խոսում ֆիսկալ քաղաքականության արմատական փոփոխությունների մասին. հարկային աճը կարող է ընդամենը «լողալ» տնտեսական աճի ընդհանուր ալիքում (2012թ. բյուջեի կանխատեսմամբ այն կկազմի 4.2%):
