Երեւանում նոյեմբերի 18-ին կկայանա երկու DVD-ների շնորհանդեսը, որոնց վրա ձայնագրված է բուլղարացի հայտնի լրագրող եւ հասարակական գործիչ Ցվետանա Պասկալեւայի 7 փաստագրական ֆիլմերից բաղկացած «Ղարաբաղի վերքերը» ֆիլմաշարը: Այս մասին նոյեմբերի 16-ի մամլո ասուլիսում հայտարարել է հենց ինքը` Ցվետանա Պասկալեւան, նշելով, որ ֆիլմերը ձայնագրվել են վեց լեզուներով` հայերեն, ռուսերեն, անգլերեն, ֆրանսերեն, իսպաներեն եւ բուլղարերեն:
Ըստ Պասկալեւայի, յուրաքանչյուր ոք, ով կհետեւի այս ֆիլմերի զարգացումներին, լինի նա երիտասարդ սերնդի կամ անգամ ոչ հայ ազգի ներկայացուցիչ, կհասկանա, թե ով է հրահրել Ղարաբաղյան պատերազմը, ինչու է Ղարաբաղի բնակչությունը արտաքսումից հետո կրկին ստիպված եղել պայքարել իր բնակավայրը հետ վերադարձնելու համար:
«Ֆիլմի իրադարձություններն ընդգրկում են 1991թ.-ից սկսած մինչեւ 1994թ. ստորագրված հրադադարի ժամանակահատվածը. «Բոլոր այդ ֆիլմերն արտացոլում են առավել նշանակալի ռազմական իրադարձությունների ընթացքը եւ իմ զուտ մարդկային վերաբերմունքը»,- նշել է նա`հավելելով, որ Ադրբեջանը տարբեր մակարդակներով արդեն բուռն արձագանքել է այդ կապակցությամբ:
«90-ականներին Ղարաբաղում իմ վավերագրական գործունեության ընթացքում ստացել եմ բազմաթիվ սպառնալիքներ, անարգանքներ, ինչպես նաեւ երեք անգամ մահվան եմ դատապարտվել ադրբեջանի կողմից: Զինադադարից հետո Ադրբեջանն ինձ փոքր-ինչ մոռացել է, բայց ես դեռ պարբերաբար ինձ ուղղված սպառնալիքներ եւ վիրավորական նամակներ եմ ստանում, մասնավորապես, Facebook սոցիալական ցանցի իմ էջում», - նշել է Պասկալեւան: