Մոտ 30 ցուցարարներ նոյեմբերի 19-ին հավաքվել էին Լոս Անջելեսի «Գեթթի» թանգարանի դարպասների մոտ` կոչ անելով վերադարձնել Թորոս Ռոսլինի ստեղծած 750-ամյա հայկական ավետարանի յոթ էջերը:
Բողոքողները փողոց էին դուրս եկել «Ամոթ Գեթթիին» եւ «Մեր պատմությունը չի վաճառվում» բովանդակությամբ պաստառներով, հայտնում է Glendale News-Press թերթը:
«Դա մեզնից խլված մշակույթի մի մասնիկն է: Դա մեր ինքնության մասնիկն է: Դա մեր անցյալի մասնիկն է»,- ասել է ցուցարարներից մեկը` Ռիտա անունով Գլենդելի բնակչուհին:
Ցուցարարները կարծում են, որ նման նախաձեռնությունները ԱՄՆ-ում հարցի նկատմամբ հասարակական հետաքրքրություն կարթնացնեն: Իրենց հերթին, բողոքի ակցիայի հակառակորդները կարծում են, որ էջերը պետք է ցուցադրվեն թանգարանում, որպեսզի մարդիկ ավելի շատ բան իմանան Հայաստանի մշակույթի մասին:
Հիշեցնենք, որ Հայ Առաքելական եկեղեցու արեւմտյան թեմը «Գեթթի» թանգարանի դեմ հայց էր ներկայացրել, որով պահանջում էր 750-ամյա հայկական աստվածաշնչի յոթ էջերը: Ըստ հայ եկեղեցու ներկայացուցիչների հավաստիացման` էջերը կորել կամ գողացվել են Օսմանյան Թուրքիայի իրականացրած Հայոց ցեղասպանության ընթացքում: Նոյեմբերի 3-ին դատարանը մերժել էր «Գեթթի» թանգարանի` հայցը չեղյալ համարելու վերաբերյալ միջնորդությունը:
«Զեյթունի ավետարանը» 1256թ. ստեղծել է հայ մանրանկարիչ Թորոս Ռոսլինը: Ավետարանի մնացած մասը պահվում է Մատենադարանում: