Մասաչուսեթսի Հայ դատի հանձնախմբի ներկայացուցիչներն անցած ամիս հանդիպում են ունեցել սենատոր Սքոթ Բրաունի հետ` հայ համայնքի համար հետաքրքրություն ներկայացնող հարցեր քննարկելու, ինչպես նաեւ ներկայումս Կոնգրեսում գտնվող օրինագծին աջակցելու կոչ անելու նպատակով, տեղեկացնում է «The Armenian Weekly»-ին:
Սենատորի հետ հանդիպել են Մասաչուսեթսի Հայ դատի հանձնախմբից Սթիվ Մեսրոպյանն ու Տիգրան Գալիքյանը եւ հանրապետական ակտիվիստ Բոբ Սիմոնյանը: Սենտատորի ուշադրությունը նրանք հրավիրել են №306 բանաձեւ նախագծի վրա, որը վերաբերում է Թուրքիայում եկեղեցական գույքի վերադարձմանը: Նախագիծն առայժմ գտնվում է Ներկայացուցիչների պալատում: Բանաձեւով Թուրքիային կոչ է արվում վերջ դնել կրոնական խտրականությանը եւ վերադարձնել հայ, հույն, ասորի եւ քրիստոնեական այլ համայնքներին պատկանող բռանգրավված գույքն ու ունեցվածքը:
Հանձնախմբի ներկայացուցիչները Բրաունին նաեւ թարմ տեղեկություններ են հաղորդել Հայոց ցեղասպանության ճանաչման №304 բանաձեւի կարգավիճակի մասին: Բրաունը Հայոց ցեղասպանության ճանաչման ջատագովներից էր Մասաչուսեթսի նահանգային սենատում: «Մենք բարձր ենք գնահատում սենատոր Բրաունի կողմից Հայոց ցեղասպանության ճանաչման փաստը եւ հուսով ենք, որ նա այստեղ եւս կարեւոր դեր կունենա հայ-ամերիկյան հարցերում», -ասել է Մեսրոպյանը:
Հանդիպմանը քննարկվել են նաեւ ԼՂՀ ինքնորոշման իրավունքին առնչվող հարցեր:
