Հայաստանը կենդանի խոզերի, ինչպես նաեւ խոշոր եւ մանր եղջրավոր անասունների ներմուծում չի իրականացնում այն երկրներից, որտեղ վերջին մի քանի տարիների ընթացքում գրանցվել են բլյութանգի` «կապույտ լեզվի» դեպքեր: Հետեւաբար, երկրում ընտանի կենդանիների հիվանդության վտանգ չկա: Այս մասին NEWS.am-ի թղթակցի հետ զրույցում հայտնել է գյուղատնտեսության նախարարության անասնաբուծության եւ տոհմային գործի վարչության ղեկավար Աշոտ Հովհաննիսյանը:
Ըստ Հովհաննիսյանի` ընթացիկ տարվա վերջին ամիսների ընթացքում Հայաստանը ներկրել է կենդանի խոզեր եւ մանր եղջրավոր անասուններ Դանիայից, Չեխիայից, Գերմանիայից եւ Շվեյցարիայից, ինչպես նաեւ Ռուսաստանից եւ Վրաստանից: Վրաստանից հիմնականում ներկրվում են ոչխարներ, որոնք Հայաստանով ուղարկվում են Իրան. «Մենք փորձում ենք խուսափել ներկրումներ անել այն երկրներից, որտեղ վերջին 10 տարիների ընթացքում գրանցվել են նմանատիպ վարակների բռնկումներ»:
Հիմնականում, նրա խոսքով, Հայաստանում խոզերը եւ եղջրավոր անասունները ներկրվում են բազմացման նպատակով, մսի համար նախատեսված չեն:
Նշենք, որ Ռուսաստանը մարտի 20-ից ժամանակավորապես դադարեցրել է կենդանի խոզերի, ինչպես նաեւ խոշոր եւ մանր եղջրավոր անասունների ներկրումը Եվրամիությունից: Այդ միջոցառումը Ռուսաստանի գյուղատնտեսության վերահսկողության վարչությունը ձեռնարկել է եվրոպական երկրներում Շմալենբերգի վարակի հարուցած հիվանդության հաճախակի բռնկումների պատճռով, նաեւ այլ`բլյութանգ հիվանդության:Երկու վարակն էլ շատ վտանգավոր են կենդանաբուծության համար:
Կիրառվող սահմանափակումները վերաբերում են միայն մորթելու համար նախատեսված կենդանիներին: Անասնաբույժների խիստ վերահսկողության տակ գտնվող տոհմական անասունների ներկրումն արգելված չէ: