Բորսայում բաժնետոմսերի նախնական տեղաբաշխման ձախողումից հետո Facebook սոցիալական ցանցի հիմնադիր Մարկ Ցուկերբերգը մի քանի միլիարդներ է կորցրել եւ դուրս է մնացել աշխարհի ամենահարուստ մարդկանց ցուցակից: Նրա ունեցվածքը 16,2 միլիարդ դոլարից կրճատվել է մինչեւ 14,7 միլիարդի:
Facebook-ի բաժնետոմսերը մայիսի 29-ի դրությամբ ընկել էին մոտավորապես 10%-ով եւ այժմ 29 դոլարից քիչ արժեն, հայտնում է Bloomberg-ը:
Այդպիսով, մայիսի 18-ից, երբ անցկացվում էր IPO-ն, ընկերության կապիտալը կրճատվել է 24%-ով եւ կազմել 79,1 միլիարդ դոլար: Այդ պահին բաժնետոմսերի նախնական արժեքը եղել է 38 դոլար: Բաժնետոմսեր շատ են թողարկվել, իսկ տեղաբաշխման արժեքը բարձրացված է եղել, կարծում են փորձագետները:
Որոշ մասնագետներ նաեւ նշում են, որ Facebook-ի համար դժվար կլինի մեծացնել շահույթները բջջայինով օգտվողների աճի պայմաններում, հայտնում է «Մոսկովսկի կոմսոմոլեցը»:
Մինչդեռ, Մարկ Ցուկերբերգն ամենեւին էլ չի նահանջում եւ ուսումնասիրում է Facebook հեռախոսի ստեղծման հնարավորությունը: