«Չորրորդ իշխանություն» թերթը գրում է. «Ինչպես հայտնի է, ՀՀ ոստիկանությունը վերջին ամիսներին զբաղված էր միայն ԲՀԿ-ով, մասնավորապես՝ կուսակցության ներկայացուցիչներին անիմաստ քաշքշելով եւ նրանց պրոֆիլակտիկ զրույցների հրավիրելով:
Սակայն պարզվեց, որ ԲՀԿ-ի «լիկվիդացիայով» ազատություն տրվեց Վլադիմիր Գասպարյանի գործունեությանը: Խոսքը մարտի սկզբին տեղի ունեցած դեպքի մասին է, երբ օրը ցերեկով սպանվեց քաղաքի հայտնի հեղինակություններից մեկը՝ իրեն ուղեկցող ընկերների հետ միասին: Այդ օրվանից ՀՀ ոստիկանապետը սկսեց արշավել քաղաքի բոլոր գողականների վրա:
Վլադիմիր Գասպարյանի էքսցենտրիզմը, սակայն, սրանով չի ավարտվում: «Դրսի գողականներին» «պատերազմ» հայտարարելուն զուգահեռ՝ ոստիկանապետ Վլադիմիր Գասպարյանը նոր «պատերազմ» է սանձազերծել նաեւ համակարգի ներսում: «Պատերազմի» արդյունքում՝ վերջին մեկ շաբաթվա ընթացքում անընդհատ մարդիկ են հեռացվում համակարգից, ոմանք հայտնվում են կադրերի տրամադրության տակ, որոշներն էլ միայն առավոտյան են տեղեկանում, որ իրենց աշխատավայրր փոխվել է:
Հարկ է ընդգծել, որ վերջին մեկ շաբաթվա ընթացքում մարզերում ոստիկանության պետերի, ժոդովրդի լեզվով ասած, միլպետների փոփոխություններ եղան: Սյունիքի մարզում ոստիկանության բոլոր բաժինների պետերը փոխվեցին, նույնը տեղի ունեցավ Շիրակում: Ընդ որում՝ հարկ է ընդգծել, որ այլ մարզերից ավելի շատ հեռացվեցին աշխատանքից, քան տեղափոխվեցին այլ համայնքներ կամ այլ ծառայությունների: Մասնավորապես, Գյումրիի ոստիկանության երկու բաժինների պետերն էլ փոխվեցին, խոսքը եւ՛ Կումայրիի, եւ՛ Մուշի մասին է (Գյումրին վերջին օրերին դարձել է հանցագործությունների հիմնական թատերաբեմ):
«ՉԻ» տեղեկություններով՝ օրերս Վլադիմիր Գասպարյանը աշխատանքից ազատել եւ սուսուփուս տուն է ճանապարհել Քրեական հետախուզության գլխավոր վարչության՝ հեղինակություններով զբաղվող վարչության պետին: Թե ով կլինի տան ճանապարհ բռնած հերթական պաշտոնյան՝ կերեւա առաջիկայում»:
Առավել մանրամասն՝ թերթի այսօրվա համարում
