«168 ժամ» թերթը գրում է. «ՀՀ էներգետիկայի եւ բնական պաշարների նախարար Արմեն Մովսիսյանը չի մեկնաբանում Հայաստան գազի ներկրման հարցով իր եւ Հայաստանում Իրանի դեսպանի հայտարարությունների հակասությունը: Մեր հարցին, թե ինչպե՞ս կմեկնաբանեք Հայաստանում Իրանի դեսպանի եւ Ձեր հակասական հայտարարությունները, Արմեն Մովսիսյանը պատասխանեց. «Դեսպանին հարցրեք` ինչո՞ւ է այդպես ասում»:

Մեր դիտարկմանը, թե Իրանի դեսպանը հայտարարում է, որ գազի ներկրման հարցով Հայաստանն իրենց հետ բանակցություններ չի վարել, նախարարը պատասխանեց. «Ես ասում եմ էն, ինչ որ կա»:

Ավելի վաղ, երբ Ա. Մովսիսյանից հետաքրքրվել էինք, թե ինչո՞ւ Հայաստանն իրանական գազից չի օգտվում, երբ այն ավելի էժան է, նախարարը հակառակն էր պնդել՝ ասելով. «Իրանական գազը 400 դոլար է եւ ավելին` սահմանի վրա, ոչ թե բնակչի մոտ»:
Մեր հարցին, թե որտեղի՞ց էր հրապարակել այդ թիվը՝ 400 դոլար, երբ իրանական կողմից հետ բանակցություններ չեն տարվել, նախարարը կրկնեց. «400-ից բարձր է… սա այն թիվն է, որն իրենք են հայտարարել»:

Մեր հարցին, թե հնարավո՞ր է, որ Հայաստանը Իրանի հետ գազի ներկրման հարցով պաշտոնական բանակցություններ վարի, Ա. Մովսիսյանը պատասխանեց. «Եթե պնդեն իրենց ասածները՝ անպայման»:

Թե ո՞ր «ասածները պնդեն»՝ նախարարը չմանրամասնեց»:

Առավել մանրամասն` թերթի այսօրվա համարում