«Հայկական ժամանակ» թերթը գրում է. «Լավատեղյակ աղբյուրներից հայտնի դարձավ, որ ռուսական «Ռոսնեֆտ» ընկերությունը ՀՀ կառավարության ներկայացուցիչներին պաշտոնապես հայտնել է, որ մտադիր չէ որեւէ ներդրումային ծրագիր իրականացնել «Նաիրիտ» գործարանում:
«Նաիրիտում» «Ռոսնեֆտի» ներդրումների մասին խոսվում է արդեն մեկ տարի եւ ամենաբարձր մակարդակով: Դեռեւս այս տարվա փետրվարին, ՌԴ վարչապետ Դմիտրի Մեդվեդեւի հետ հանդիպման արդյունքներով, այն ժամանակվա վարչապետ Տիգրան Սարգսյանը հայտարարեց, թե «Ռոսնեֆտը» պատրաստվում է Հայաստանում 500 մլն դոլարի ներդրում անել, որից մի զգալի մասը՝ «Նաիրիտում»: Ու չնայած ՀՀ իշխանությունները վաղուց իրազեկված են, որ «Նաիրիտի» թեման փակված է, այդ մասին նախընտրում են լռել, քանի որ դա կարող է «Նաիրիտի» աշխատակիցների շրջանում կրքեր բորբոքել: Բանն այն է, որ նաիրիտցիները մոտ մեկ տարվա աշխատավարձ չեն ստացել, եւ կառավարությունը նրանց սնում է հույսերով, թե «Ռոսնեֆտը» շուտով գնելու է «Նաիրիտը», եւ գործերը լավ են գնալու: Հիմա արդեն պարզ է, որ «Ռոսնեֆտը» «Նաիրիտը» չի գնելու, եւ գործերի լավ լինելը բոլորովին այլ հարց է»։
Առավել մանրամասն՝ թերթի այսօրվա համարում