«Առավոտ» թերթը գրում է. «Հայաստանին կարծես թե բախտ չի վիճակվում ունենալ տեղական ավիափոխադրող, մեկը մյուսի հետեւից խնդիրներ են ունենում. «Հակական ավիաուղիները» սնանկացավ, հետո՝ «Ամավիան» դադարեցրեց գործունեությունը, հիմա էլ՝ «Էյր Արմենիան»: Լուրեր են շրջանառվում, որ այս ընկերությունը հնարավոր է սնանկանա կամ այլեւս ուղեւորափոխադրում չկատարի. Ներկայումս ընկերությունը մինչեւ դեկտեմբերի 20-ը դադարեցրել է չվերթները:
«Էյր Արմենիան» «Արմավիայից» հետո շուկա մտավ եւ մոտ մեկ տարի կանոնավոր ուղեւորափոխադրումներ էր իրականացնոմ, մեկ էլ հանկարծ սեպտեմբերի 11-ին ռուսական «Օդային հաղորդակցության կազմակերպման պետական կորպորացիան» («Ռոսաերոնավիգացիա») հայտարարեց, որ սեպտեմբերի 21-ից հայկական ավիաընկերությանը թույլ չեն տալու ռուսական օդային տարածք մտնել՝ պարտքեր ունի կուտակած: Այս հայտարարությանը հետեւեց արդեն գնված տոմսերի վերադարձը, սա, իհարկե, անհետեւանք չմնաց. ընկերությունը մեծ վնասներ կրեց:
«Առավոտի» հետ զրույցում ավիաընկերության մարքեթինգի պատասխանատու Սիրակ Համբարձումյանն ասում է, որ ռուսական հայտարարությունից հետո րոպեում 6 տոմս էր վերադարձվում, ընդհանուր ամամբ 60 տոկոսով նվազեց տոմսերի վաճառքը, այսինքն՝ նույնքան չափով նվազեց ընկերության հասույթը, եւ երբ սնանկության լուրերն էլ տարածվեցին, եւս 20 տոկոսով նվազեց տոմսերի վաճառքը: Հայկական ավիաընկերության այս վնասներից, բնական է, օգտվեցին ռուսական ավիաընկերությունները, մարդիկ հայկական ընկերության տոմսերը վերադարձնում էին, թռչում ռուսական ավիաընկերությամբ, շահույթն էլ ռուսական գրպան էր գնում: Արդյոք միտումնավոր չէ՞ր այդ քայլը՝ մեր այս հարցին պրն Համբարձումյանը ոչ այո է ասում, ոչ էլ՝ ոչ: Հայկական ավիաընկերության ներկայացուցիչը, սակայն, պնդում է, որ ռուսական կազմակերպության հայտարարությունը վնասեց իրենց հեղինակությունը»:
Առավել մանրամասն՝ թերթի այսօրվա համարում