Լոռիի մարզում, այսօր` ապրիլի 6-ին, ժամը 13:15-ից, խոշոր հրդեհ է բռնկվել Հայաստան-Վրաստան սահմանին գտնվող անտառներում, Տաշիրի տարածաշրջանի Գոգավան գյուղի տարածքում:
Ինչպես դեպքի վայրից հայտնում է NEWS.am-ի Լոռիի մարզի թղթակիցը, հրդեհաշիջման աշխատանքներն իրականացնում են Տաշիրի հրշեջ-փրկարարական ջոկատի 10 հրշեջներ:
Դեպքի վայր է մեկնել մեկ մարտական հաշվարկ, ինչպես նաեւ նշված անտառի անտառապահը:
Կրակը որոշ հատվածներում անցել է Վրաստանի սահմանը: Հայ փրկարարներին օգնում են վրացի սահմանապահները:
Այս պահի դրությամբ, այրվել է շուրջ 15 հա անտառապատ տարածք: Այրվում են նաեւ Փամբակի, Եղեգնուտի եւ Սարատովկա համայնքների անտառները:
Նշենք, որ միայն վերջին 3 օրում Լոռիի մարզում փրկարարական վարչության դիսպետչերական կետում գրանցվել է մոտ 45 հրդեհ: Միայն այսօր մարզի ողջ տարածքում գրանցվել է 19 հրդեհ:
