Չինաստանում եռաչափ ֆորմատով «Տիտանիկից» հանել են այն տեսարանը, որտեղ Լեոնարդո դի Կապրիոն նկարում է մերկ Քեյթ Ուինսլեթին: Ինչպես տեղեկացնում է Los Angeles Times-ը, նման որոշում են կայացրել` վախենալով, որ հանդիսատեսը կփորձի ձեռք տալ մերկ կնոջը:
«Քանի որ եռաչափ էֆեկտները շատ բնական են, վախենում ենք, որ հանդիսատեսները կփորձեն ձեռք տալ, իսկ դա մնացածներին թույլ չի տա հանգիստ դիտել ֆիլմը», - հայտարարել են Չինաստանի պետական հեռուստառադիոընկերության վարչությունում:
«Որպեսզի խուսափենք հանդիսատեսի միջեւ հնարավոր հակասություններից, մենք որոշել ենք կտրել մերկ տեսարանները»,- հայտնել է վարչությունը:
Ընդ որում, հիասթափված հանդիսատեսներից մեկը հայտնել է, որ սպասել է այդ կինոնկարը դիտելու հնարավորությանը գրեթե 15 տարի, սակայն ակնհայտ է, որ չի տենչացել սառցաբեկորները տեսնել:
Կինոստուդիայի համար ավելի կարեւոր է դառնում չինական լսարանը, քանի որ երկիրը դարձել է հոլիվուդյան ֆիլմերի առաջատար արտասահմանյան շուկաներից մեկը: Ջեյմս Քեմերոնի «Տիտանիկ» ֆիլմի եռաչափ տարբերակը վարձույթի առաջին շաբաթվա ընթացքում հավաքել է 35 միլիոն դոլար, մանրամասնում է gazeta.ru-ն:
Երբ «Տիտանիկը» Չինաստանում թողարկվել էր 14 տարի առաջ, այն ցուցադրել էին միայն 180 կինոթատրոններում: Այս շաբաթ «Տիտանիկ 3D»-ն ցուցադրվել է 3,5 հազար կինոթատրոններում: