«Բարգավաճ Հայաստան» կուսակցության առաջնորդ Գագիկ Ծառուկյանը մի շարք հանդիպումներ է անցկացրել երեւանյան ընտրողների հետ:
Մասնավորապես, Ծառուկյանը հանդիպել է Երեւանի Աջափնյակ, Կենտրոն, Շենգավիթ, Էրեբունի վարչական շրջանների բնակիչներին: Ծառուկյանը ընտրողներին վստահեցրել է, որ սպասվելիք ընտրություններում խախտումներ չի հանդուրժի:
«Մենք չպետք է ժողովրդին համոզենք, այլ` ներկայացնենք մեր աշխատանքը», - նշել է Ծառուկյանը` հավելելով, որ բնակչության վստահությունը այն բանի հետեւանք է, որ «Բարգավաճ Հայաստանի» խոսքը գործից երբեք չի տարբերվել:
Մայիսի 6-ին կայանալիք խորհրդարանական ընտրություններին կմասնակցեն 9 կուսակցական ուժեր: Մեծամասնական համակարգով առաջադրվել է 154 թեկնածու:
«Բարգավաճ Հայաստան» կուսակցության համամասնական ցուցակում կա 165 անուն: Ցուցակի առաջին եռյակում են «Մուլտի գրուփ» կոնցեռնի ղեկավար, «Բարգավաճ Հայաստան» կուսակցության առաջնորդ Գագիկ Ծառուկյանը, ՀՀ երկրորդ նախագահ Ռոբերտ Քոչարյանի կառավարման օրոք Հայաստանի ԱԳՆ-ի նախկին ղեկավար Վարդան Օսկանյանը, քաղաքաշինության նախարար Վարդան Վարդանյանը: «Բարգավաճ Հայաստանը» իշխող կոալիցիայի կազմում է: