Կիեւում, այսօր` ապրիլի 13-ին, կայացել է կլոր սեղան` «Հայոց ցեղասպանություն. Անպատժելիությունը նախադեպ է ստեղծում» խորագրով: Միջոցառման նախաձեռնողը Ուկրաինայի թոշակառուների կուսակցության ղեկավար Ամրամ Պետրոսյանն է, հաղորդում է analitika.at.ua-ն:
Կլոր սեղանին մասնակցել են հայտնի ուկրաինացի քաղաքագետներ, լրագրողներ, գիտնականներ, հասարակական եւ քաղաքական գործիչներ:
Կլոր սեղանի արդյունքում ուոշում է կայացվել դիմել երկրի նախագահին եւ խորհրդարանին` խնդրելով օրենսդրական մակարդակով ճանաչել Հայոց ցեղասպանությունը:
Միջոցառման ընթացքում, որպես ցեղասպանության օրինակ ցուցադրվել է «Սովորական ցեղասպանություն. Մարաղա, 1992թ ապրիլի 10» ֆիլմը:
Ուկրաինայում Հայոց ցեղասպանության ճանաչման գործընթացն սկսվել է 2005-ի մայիսի 19-ին, երբ Ղրիմի Գերագույն ռադան որոշել է ապրիլի 24-ը հռչակել հայ ժողովրդի ողբերգության զոհերի հիշատակի օր:
2010-ի ապրիլի 23-ին հայտնի ուկրաինացի քաղաքագետներ, գիտնականներ, հասարակական եւ քաղաքական գործիչներ, նաեւ Ուկրաինայի մի շարք ազգային համայնքներ դիմել են երկրի նախագահին եւ խորհրդարանին` խնդրելով օրենսդրական մակարդակով ճանաչել Հայոց ցեղասպանությունը: