«Մենք քիչ ասելու ենք, շատ անելու, ամենակարեւորը դոշ չենք ծեծում, որ դուք մեզ ձայն տաք, ոչ էլ խնդրում ենք, մենք ամեն ինչի հասած մարդիկ ենք»,-այս մասին այսօր Դիլիջանում հայտարարել է ԲՀԿ առաջնորդ Գագիկ Ծառուկյանը: «Ես իմ երկրից ոչ մի տեղ չեմ գնալու, դրա համար այսօր ես այս ծանրության տակ մտել եմ ոչ թե իմ կաշին փրկելու,պաշտոն ստանալու, ունեցվածք դիզելու: Աստծո կամոք ամեն ինչ էլ ունեմ, ուզում եմ կարողանանք օգտակար լինել, հետեւողական լինել, որ բոլորն էլ ուշադրության կենտրոնում լինեն, որ չհիասթափվեն ու չկոտրվեն մարդիկ: Պարտքի տակ ընկնելով չթողնեն իրենց հայրենիքը ու գնան, այլ կարողանան լիարժեք այստեղ աշխատեն ու իրենց ընտանիքի հոգսը հոգան»,-ասաց նա:
«Ընտրողը դուք եք, դուք պետք է նայեք ամեն մարդու, թե ով է ինքը, ոսկե սարեր ես ձեզ չեմ խոստանում, ինչ-որ ծրագրում կա,անմիջապես, 3 ամսում իրականություն է դառնալու»,-նկատել է Ծառուկյանն ու հավելել. «Ամեն ինչը գիտեմ, պրոբլեմն ու խնդիրը, հոգսն ու ցավը, միայն հիմա կասեմ, որ ձեր ճակատագրի լուծողը դուք եք: Այսօր ոչ մի պաշտոնյա, քաղաքապետ ու գյուղապետ, ձեզ ստիպելով ու պարտադրելով կասի, որ ձեր ձայնը սրան կամ նրան տաք, դա անում են իրենց կաշին փրկելու ու աթոռ փրկելու համար»:
ԲՀԿ առաջնորդի փոխանցմամբ, հիմա ժողովրդի ապագայի հարցն է դրված. «Ձեզ հնարավորություն է տրվում, որ 5 տարին մեկ անգամ ձեր ընտրությունը կատարեք` պարզ, արդար ու թափանցիկ»:
Այնուհետ նա դիլիջանցիներին հայտարարեց, որ եթե որեւէ մեկը փորձի կպնել իր թիմակցին, ուրեմն իրեն են կպնելու: «Եթե հարց կա, զանգեք, դիմեք: Իրենք ուղղակի քամի ու փոթորիկ են անում, ես ձեր կողքին կանգնած եմ, երբ զանգեք... ոչ մեկը բարոյապես իրավունք չունի փորձի իմ թիմակցին նեղացնել»:
Հանդիպման վերջում ԲՀԿ ղեկավար Գագիկ Ծառուկյանն անձամբ ԲՀԿ անդամատոմսեր բաժանեց մի քանի հոգու, ապա ուղեւորվեց Տավուշի մարզի Հաղարծին գյուղ:
