Ուժեղ հրդեհը գրեթե ամբողջությամբ ոչնչացրել է Ռուսաստանի Ամուրի շրջանի Տիգդա գյուղը: Ապրիլի 20-ին երեք ժամվա ընթացքում կրակը շուրջ 200 բնակելի տներ եւ բակային շինություններ է ոչնչացրել: Արդյունքում 120 մարդ մնացել է առանց տանիքի, այդ թվում` 28 երեխաներ:
Այս պահին Տիգդայում աշխատում են փրկարարները եւ հոգեբանները:
Վերջին տվյալներով` զոհվել է տարեց մի կին` չհասցնելով ժամանակին դուրս գալ տնից: Եւս մեկը խոր այրվածքներով գտնվում է տեղի հիվանդանոցի վերակենդանացման բաժանմունքում: Եւս երկու մարդ սրտի հետ կապված խնդիրներով տեղափոխվել են հիվանդանոց:
Լրատվամիջոցների հաղորդմամբ, հրդեհը բռնկվել է սղոցարանի մեքենայական բաժնում տրանսֆորմատորի կարճ միացման հետեւանքով: 24 մ/վ ուժգնությամբ քամու հետեւանքով հրդեհը տարածվել է ողջ գյուղում:
Իշխանությունները հայտնել են որ տուժածներին փոխհատուցում կտրվի եւ նրանց համար նոր տներ կկառուցվեն: