Երեւանը 2012 թվականին գրքի համաշխարհային մայրաքաղաք հռչակելու միջոցառումներին մասնակցելու նպատակով Երեւանում գտնվող պաշտոնական պատվիրակությունների անդամները, Երեւանի քաղաքապետ Տարոն Մարգարյանի ուղեկցությամբ, այցելել են Ծիծեռնակաբերդի հուշահամալիր եւ իրենց հարգանքի տուրքը մատուցել Հայոց  ցեղասպանության զոհերի հիշատակին:

Ինչպես NEWS.am-ին հայտնեցին Երեւանի քաղաքապետրանի մամուլի ծառայությունից, հյուրերն այցելել են նաեւ Հայոց ցեղասպանության թանգարան, որտեղ տնօրեն Հայկ Դեմոյանը ներկայացրել է Մեծ Եղեռնի փաստը վկայող վավերագրերը, նյութերն ու արխիվային փաստաթղթերը: Ծիծեռնակաբերդ այցելած Բուենոս Այրեսի, Վենետիկի, Բեյրութի քաղաքապետերն ու Բանգկոկի փոխքաղաքապետը գրառումներ են կատարել թանգարանի պատվավոր հյուրերի հուշամատյանում: