Թեհրանում հարյուրավոր հայեր ապրիլի 24-ի առավոտյան հավաքվել են Հայոց ցեղասպանության զոհերի հուշարձանի մոտ` հարգելու Օսմանյան Թուրքիայում նախորդ դարասկզբին սպանված 1.5 միլիոն հայերի հիշատակը:
Իրանում Հայաստանի դեսպանը, խորհրդարանում հայերի ներկայացուցիչները, հայ պաշտոնյաները եւ Թեհրանի քաղաքացիները պսակներ են դրել Ցեղասպանության զոհերի հուշարձանին, հայտնում է IRNA գործակալությունը:
Թեհրանում Հայ առաքելական եկեղեցու թեմի արքեպիսկոպոս Սեպուհ Սարգսյանը հայտարարել է, որ չնայած Օսմանյան կայսրությունում կատարված դեպքերից անցել է գրեթե 100 տարի, աշխարհի հայությունը երբեք չի մոռանա Ցեղասպանությունը:
Հավաքվածները նաեւ կոչ են արել թուրքական կառավարությանը ճանաչել եւ պաշտոնապես ներողություն խնդրել Հայոց ցեղասպանության համար: