Փարիզի քաղաքապետ Բերտրան Դելանոեն, այսօր` ապրիլի 24-ին, պատվավոր հյուրերի համար նախատեսված սրահում ընդունել է քաղաքի անվանի հայերին` Ֆրանսիայում Հայաստանի դեսպան Վիգեն Չիթեչյանի գլխավորությամբ: Այդ մասին հաղորդում է Nouvelles d`Arménie-ն:
Իր ելույթում քաղաքապետն ասել է. «Հայոց ցեղասպանությունը բարբարոսություն էր մարդկության դեմ, մեզ վրա դրված է պատմության այդ փուլը կենդանի պահելու պատասխանատվությունը: 97 տարի անց անհրաժեշտ է խոսել այդ փաստերի մասին եւ տալ նրանց պատմական ճշմարտության ուժ»:
Ֆրանսիայի հայկական կազմակերպությունների համակարգող խորհրդի երկու համանախագահների` Մուրադ Փափազյանի եւ Արա Թորանյանի խոսքով, «սա մեծ օր է, քանի որ նախագահի երկու թեկնածուները` Նիկոլա Սարկոզին եւ Ֆրանսուա Օլանդը ներկա են լինելու Կանադայի հրապարակում տեղադրված Կոմիտասի արձանի մոտ` ոգեկոչելու Հայոց ցեղասպանության զոհերի հիշատակը»:
