Ֆրանսիայի Ֆրանշ Կոնտե շրջանի Մոնբելյար քաղաքի Անատոլ Ֆրանս դպրոցում  նախորդ շաբաթ պատմության եւ աշխարհագրության ժամին աշակերտներին ցեղասպան Թուրքիայի մասին պատմող ծաղրանկարից բացի նախկինում եւս նմանատիպ ծաղրանկար են բաժանել:

Թուրքական Hurriyet-ի փոխանցմամբ`հիշյալ դպրոցի թուրք աշակերտներից մեկի ծնողը երեխայի դասագքրերը ստուգելու ժամանակ հայտնաբերել է մի ծաղրանկար, որտեղ պատկերված է եղել սուլթան Աբդուլ Համիդը`  արյունոտ ձեռքերով եւ դաշույնը բերանը դրած: Ծաղրանկարում գրված է եղել. «Թող նրանք իրենց գործերով զբաղվեն, ես մի քիչ հայ սպանեմ»:

Նշենք, որ նախորդ շաբաթ Անատոլ Ֆրանս դպրոցում աշխարհագրություն եւ պատմություն դասաժամին ուսուցիչը աշակերտներին ներկայացրել է մի ծաղրանկար, որի մեջ պատկերված է եղել բեղավոր մի մարդ, ով կքած տանում է մարդկային կմախքներով լի մի պարկ, որի վրա գրված է. «Թուրքիա»։ Մարդկային կմախքներին վերեւը նշված է «Հայոց ցեղասպանություն»։ Կմախքներով լի պարկի կողքը կանգնած մի մարդ, ով խորհրդանշում է Ֆրանսիան, պարկից հանել եւ ցուցադրում է մարդկային գանգերից մեկը։  Ծաղրանկարի ձախ կողմում մի սար է պատկերված, որի գագաթին պարզված է Եվրամիության դրոշը, որի ուղղությամբ մարդիկ են շարժում։