Քաղաքական բոլոր ուժերը կարող են միանալ հինգ քաղաքական ուժերի հայտարարությանը, որով Ազգային անվտանգության ծառայությունից խնդրում են տրամադրել քվեարկությանը մասնակցած այս կամ այն քաղաքացու տվյալները: Այդ մասին այսօր` ապրիլի 28-ին, լրագրողների հետ հանդիպմանը հայտարարել է ՀՀԿ շտաբի պետի տեղակալ, ԱԺ պատգամավոր Դավիթ Հարությունյանը:
Վերջինիս խոսքով, իրենք արդեն նախնական քննարկումներ են իրականացրել ԱԱԾ-ի հետ, եւ դրական տպավորություն են ստացել: Նշենք, որ հայտարարությունը տարածել են ՀՀԿ-ն, ՀՅԴ-ն, ՕԵԿ-ը, Կոմկուսը եւ ՀԴԿ-ն: Դավիթ Հարությունյանը ԲՀԿ-ի ստորագրության բացակայությունը բացատրել է այն փաստով, որ ԲՀԿ-ի ներկաայցուցիչը չի մասնակցել քննարկումներին, սակայն հույս է հայտնել, որ «Բարգավաճ Հայաստանը» կմիանա: Ի դեպ, քննարկումներին կտրականապես հրաժարվել է մասնակցել Հայ ազգային կոնգրեսը:
Անդրադառնալով ընտրությունների վերահսկման միասնական շտաբի կողմից Սահմանադրական դատարան դիմելու փաստին` Դավիթ Հարությունյանն ասել է, թե դա քաղաքական քայլ էր: «Ընտրություններին մասնակցածների ցուցակների հրապարակումը օրենսդիրի իրավասությունն է: Եվրոպական կոնվենցիաներն ասում են, որ ստորագրված ցուցակները չի կարելի հրապարակել»,- նշել է Հարությունյանը` հավելելով, որ Վենետիկի հանձնաժողովի փաստաթղթով «Քանի որ ընտրություններին չմասնակցելը եւս կամքի արտահայտում է, մասնակիցների ցուցակները չպետք է հրապարակվեն»:
Հարցին, թե ինչպես կմեկնաբանի կոալիցիոն գործընկեր ԲՀԿ-ի պահվածքը, Դավիթ Հարությունյանը նշել է. «ԲՀԿ-ի իրենց քայլը հետապնդում է նախընտրական քարոզչության տարր: Ուղղակի նույնիսկ ժամանակային առումով հնարավոր չէ հասցնել: Այդ քայլի տակ բովանդակային ոչինչ չկա»:
Նշենք, որ ՀՀԿ-ի, ՀՅԴ-ի, ՕԵԿ-ի, Կոմկուսի եւ ՀԴԿ-ի ներկայացուցիչները հանդես են եկել հայտարարությամբ, որտեղ անդրադառնում են Հայաստանից բացակայողների խնդրին: «Միաժամանակ կարեւորելով ընտրությունների ժամանակ երկրից բացակա անձանց փոխարեն քվեարկելը բացառելը եւ նպատակ ունենալով լրացուցիչ վերահսկողական մեխանիզմներ սահմանելու այդ ուղղությամբ, նշված կուսակցությունների անունից մենք դիմում ենք ՀՀ ԿԱ ԱԱԾ հետեւյալ առաջարկությամբ` մայիսի 6-ից մինչեւ ընտրությունների արդյունքները անվավեր ճանաչելու մասին ընտրական հանձնաժողով դիմում ներկայացնելու համար սահմանված ժամկետի ավարտը ընձեռել նշված կուսակցությունների մեկական ներկայացուցչի ՍԵԿՏ համակարգից օգտվելու հնարավորություն` ստուգելով իրենց տեղեկություններով քվեարկության մասնակցած այս կամ այն քաղաքացու վերաբերյալ համակարգում առկա տվյալները, եթե այդ քաղաքացին քվեարկությանը մասնակցել է այն տեղամասում, որի արդյունքերը անվավեր ճանաչելու մասին օրենքով սահմանված կարգով դիմում է ներկայացվել կամ ներկայացվելու:
Մենք երաշխավորում ենք, որ համակարգի միջոցով ստացված տվյալները կօգտագործվեն բացառապես երկու նպատակներով` ա. ընտրությունների արդյունքերը անվավեր ճանաչելու պահանջով դիմելիս, բ. իրավախախտ անձանց պատասխանատվության ենթարկելու համար ոստիկանությանը դիմելիս:»,- ասված է հայտարարության մեջ:
ԻՍԿ միասնական շտաբին մաս կազմող ՀԱԿ-ը, ԲՀԿ-ն եւ ՀՅԴ-ն որոշել են դիմել ՍԴ` ընտրություններին մասնակցող անձանց ցուցակները հրապարակելու խնդրանքով:
