Հայաստանի ոստիկանությունը ընտրողների ցուցակը կհրապարակի մայիսի 3-ին` օրենքով սահմանված ժամկետում: Այդ մասին NEWS.am-ի թղթակցի հետ զրույցում նշեց ոստիկանության անձնագրային եւ վիզաների վարչության պետ Հովհաննես Քոչարյանը` մեկնաբանելով մամուլում շրջանառվող տեղեկությունները, թե ցուցակների հրապարակումը մեկ օրով հետաձգվել է:
«Ընտրողների ցուցակը օրենսդրության համաձայն հրապարակվում է ընտրությունների օրվանից երեք օր առաջ, եւ անձնագրային ու վիզաների վարչությունը չի շրջանցել այդ դրույթը: Քվեարկությունից երեք օր առաջ ընտրողների ռեգիստր վարող լիազոր մարմինը տեղեկանք է տրամադրում Կենտրոնական ընտրական հանձնաժողովին ընտրողների թվի վերաբերյալ եւ այդ ժամկետն էլ խախտված չէ: ԸՕ-ով նախատեսված որեւէ ժամկետ չի խախտվել»,- նշեց վարչության պետը:
Հովհաննես Քոչարյանը նաեւ ուռճացված համարեց տեղեկությունները, թե անձնագիր չունեցող 8 հազար քաղաքացիներ անձնագիր են ստանալու:
«Ոչ թե 8 հազար, այլ 800: 18 եւ ավելի տարիքի անձինք առաջին անգամ դիմել են անձնագիր ստանալու, եւ որպեսզի հնարավորություն ստանան ընտրելու, բնականաբար անձագրավորման գործընթացը շարունակելու ենք: Ընդհանուր կանոնից որեւէ շեղում տեղի չի ունեցել»,- նշեց Հովհաննես Քոչարյանը:
