Ադրբեջանի տարածքում` Շեքի քաղաքից 28 կմ դեպի հյուսիս-արեւմուտք այիսի 7-ին, ժամը 18.15-ին նորից տեղի է ունեցել 5.4 մագնիտուդով հետցնցում, 7-8 բալ ուժգնությամբ: Այս մասին NEWS.am-ին հայտնեցին Հայաստանի ԱԻՆ սեյսմիկ պաշտպանության ազգային ծառայությունից:
Նրանց փոխանցմամբ` երկրաշարժի հիպոկենտրոնը գտնվում է 10կմ խորության վրա:
Հայաստանի տարածքում այն զգացվել է 3-4 բալ ուժգնությամբ` մասնավորապես Երեւանում 3 բալ:
Ավելի վաղ NEWS.am-ը հայտնել էր, որ մայիսի 7-ին, տեղական ժամանակով ժամը 08:40-ին գրանցել է 5,9 մագնիտուդով երկրաշարժ (նախնական տվյալներով), որի էպիկենտրոնը գտնվում է Ադրբեջանի տարածքում Շեքի քաղաքից 28 կմ դեպի հյուսիս-արեւմուտք: Էպիկենտրոնի աշխարհագրական կորդինատներն են՝ հյուսիսային լայնության 41.380 եւ արեւելյան երկայնության 46.950: Երկրաշարժի հիպոկենտրոնը գտնվում է 10 կմ խորության վրա: Երկրաշարժի ուժգնությունը էպիկենտրոնային գոտում կազմել է 8 բալ: Ըստ ադրբեջանական լրատվամիջոցների` երկրաշարժի հետեւանքով տեղի են ունեցել ավերածություններ:
Նախնական տվյալներով` երկրաշարժը զգացվել էր նաեւ Հայաստանի տարածքում 3-4 բալ ուժգնությամբ: